नंदुरबार जिल्हा परिषदेचा स्तुत्य उपक्रम: सेवानिवृत्तीच्या दिवशी मिळाले सेवा निवृत्ती लाभाचे आदेश आणि सेवापुर्ती सन्मान!
नंदुरबार : सप्त नगरी न्यूज ब्युरो शासकीय सेवेतून निवृत्त होणारा कर्मचारी ज्या दिवशी खुर्ची सोडतो, त्याच दिवशी त्याच्या मनात भविष्यातील आर्थिक लाभांची चिंता सुरू होते. पेन्शन आणि इतर लाभांसाठी कार्यालयांचे उंबरठे झिजवणे हे अनेकदा क्लेशदायक ठरते. मात्र, नंदुरबार जिल्हा परिषदेने या परंपरेला छेद दिला आहे.
मुख्य कार्यकारी अधिकारी श्री. नमन गोयल यांच्या संकल्पनेतून ‘सेवानिवृत्तीच्या दिवशीच लाभ आणि सन्मान’ या उपक्रमाचे तिसरे पुष्प 30 मार्च २०२६ रोजी अत्यंत भावूक आणि उत्साही वातावरणात संपन्न झाले.
प्रशासनाचा ‘कर्तव्य’ भाव आणि सन्मान
जिल्हा परिषदेच्या ‘याहा मोगी’ सभागृहात आयोजित या सोहळ्यात मार्च २०२६ मध्ये सेवानिवृत्त होणाऱ्या वर्ग-३ आणि वर्ग-४ च्या कर्मचाऱ्यांचा मा. नमन गोयल, मुख्य कार्यकारी अधिकारी, जिल्हा परिषद नंदुरबार यांचे हस्ते गौरव(सन्मान) करण्यात आला.
यावेळी बोलताना नमन गोयल यांनी प्रशासकीय संवेदनशीलतेचा वस्तुपाठ मांडला. ते म्हणाले, “कर्मचारी आपल्या आयुष्यातील ३० ते ३५ वर्षे प्रशासनाला सेवा देतात. अशा कर्मचाऱ्यांना त्यांच्या निवृत्तीच्या दिवशीच सर्व लाभ देऊन सन्मानपूर्वक निरोप देणे, हे प्रशासनाचे केवळ काम नसून ते ‘कर्तव्य’ आहे.”
काय आहे हा नाविन्यपूर्ण उपक्रम?
नंदुरबार जिल्हा परिषदेने सुरू केलेला हा पॅटर्न राज्यातील इतर जिल्ह्यांसाठी मार्गदर्शक ठरणारा आहे. या उपक्रमाची काही वैशिष्ट्ये:
- तात्काळ आर्थिक लाभ: सेवानिवृत्तीच्या दिवशीच पीएफ (PF), ग्रॅच्युइटी आणि इतर देय लाभांचे आदेश कर्मचाऱ्यांच्या हाती सुपूर्द केले जातात.
- दप्तरदिरंगाईला पूर्णविराम: लाभ मिळवण्यासाठी कर्मचाऱ्यांना निवृत्तीनंतर कार्यालयाचे हेलपाटे मारण्याची गरज उरणार नाही.
- यथोचित सन्मान: केवळ कागदपत्रेच नव्हे, तर शाल, स्मृतीचिन्ह आणि श्यामची आई पुस्तक देऊन कर्मचाऱ्यांचा यथोचित गौरव(सन्मान) केला जातो.
- सत्कारमूर्तींच्या डोळ्यांत आनंदाश्रू
यावेळी दि. 31 मार्च 2026 रोजी सेवानिवृत्त होणारे कर्मचारी राजेंद्र साळवे, पांडुरंग बबन पाटील, अजय पांडुरंग पाटील, ईश्वर माकु कोकणी, मिनाक्षी कर्मा कोकणी, कैलास धुडकु सुर्यवंशी, अरुण दयाराम भामरे, प्रभातसिंग उरश्या वळवी, युवराज खंडु मराठे, रेखा बंडु पाटील, काशिराम भिका-या थविल, सुरमल पाडक्या चव्हाण, रेमता नंदल्या गावित, दिलीप रामा सोनवणे, विरसिंग महा-या पावरा यांचा त्यांच्या कुटुंबासह सन्मान करण्यात आला. आपले मनोगत व्यक्त करताना प्राथमि शिक्षक श्री अरुण दयाराम भामरे आणि विस्तार अधिकारी (शिक्षण)श्रीम. रेखा बंडु पानपाटील भावूक झाले होते. ” आजच्या या सन्मानाने आम्ही खुप आनंदी असुन भारावुन गेलो आहे,” अशा शब्दांत त्यांनी प्रशासनाचे आभार मानले.
उपस्थित मान्यवर
या सोहळ्याला अतिरिक्त मुख्य कार्यकारी अधिकारी चंद्रकांत पवार, उपमुख्य कार्यकारी अधिकारी (सामान्य) गणेश मोरे, शिक्षणाधिकारी, भानुदास र.रोकडे यांच्यासह इतर विभागांचे विभाग प्रमुख जिल्हा मुख्यालयातील अधिकारी व कर्मचारी, संघटनेचे पदाधिकारी उपस्थित होते.
नंदुरबार जिल्हा परिषदेचा हा उपक्रम प्रशासकीय पारदर्शकता आणि कर्मचाऱ्यांप्रती असलेली आत्मीयता याचे जिवंत उदाहरण आहे.
- 0
- 0
- 0
- 0
