आदिवासीबहुल नंदुरबारचा युवक राष्ट्रीय युवा संसदेत झळकणार!देशभरातील २०० युवकांमध्ये समावेश,धानोरा येथील जिल्ह्यातून एकमेव इंजि. शुभम चौधरी यांची निवड; 

आदिवासीबहुल नंदुरबारचा युवक राष्ट्रीय युवा संसदेत झळकणार!

देशभरातील २०० युवकांमध्ये समावेश,धानोरा येथील जिल्ह्यातून एकमेव इंजि. शुभम चौधरी यांची निवड; 

नंदुरबार |सप्त नगरी न्यूज ब्युरो – दि. २ ऑक्टोबर २०२६ : आदिवासीबहुल नंदुरबार जिल्ह्यासाठी अभिमानाची बाब ठरावी अशी कामगिरी धानोरा येथील इंजि. शुभम संजीव चौधरी यांनी केली आहे. ग्रामीण भागात शेतकरी कुटुंबात जन्मलेल्या इंजि. शुभम संजीव चौधरी यांची ऑक्टोबर २०२६ च्या राष्ट्रीय युवा संसदेसाठी प्रतिनिधी म्हणून अंतिम निवड झाली आहे. विशेष म्हणजे, संपूर्ण भारतातून निवड झालेल्या केवळ २०० युवकांमध्ये त्यांचा समावेश असून, नंदुरबार जिल्ह्याचे प्रतिनिधित्व करण्याची संधी त्यांना मिळाली आहे. जिल्ह्यातून या राष्ट्रीय युवा संसदेकरिता निवड झालेले ते एकमेव प्रतिनिधी आहेत.

संसद सभा – राष्ट्रीय युवा संसद यांच्या वतीने घेण्यात आलेल्या निवड प्रक्रियेत विविध निकषांवर मूल्यांकन केल्यानंतर चौधरी यांची निवड करण्यात आली. ग्रामीण व शेतकरी कुटुंबाच्या पार्श्वभूमीतून शिक्षणाच्या जोरावर राष्ट्रीय स्तरावरील या व्यासपीठावर पोहोचण्याची आणि नंदुरबार जिल्ह्याचे प्रतिनिधित्व करण्याची संधी त्यांना मिळाली आहे.

२४ व २५ ऑक्टोबर २०२६ रोजी जयपूर, राजस्थान येथे राष्ट्रीय युवा संसदेचे आयोजन करण्यात येणार आहे. संपूर्ण भारतातून निवड झालेले केवळ २०० युवक या उपक्रमात सहभागी होणार असून, विविध समकालीन विषयांवर चर्चा, विचारांची देवाणघेवाण आणि संवाद साधला जाणार आहे. युवकांमध्ये नेतृत्वगुण, लोकशाहीविषयक जाण आणि सामाजिक जबाबदारीची भावना विकसित करण्याच्या दृष्टीने हा उपक्रम महत्त्वपूर्ण आहे.

नंदुरबारसारख्या आदिवासीबहुल जिल्ह्यातील ग्रामीण भागातून आलेल्या शुभम चौधरी यांची राष्ट्रीय स्तरावर झालेली निवड विशेष उल्लेखनीय आहे. शेतकरी कुटुंबातून आलेल्या या युवकाला देशभरातून निवड झालेल्या २०० युवकांमध्ये स्थान मिळाले असून, राष्ट्रीय युवा संसदेत नंदुरबार जिल्ह्याचे प्रतिनिधित्व करण्याची संधी मिळाली आहे. ही बाब जिल्ह्यातील ग्रामीण भागातील विद्यार्थी आणि युवकांसाठी प्रेरणादायी ठरत आहे.

निवडीनंतर चौधरी यांना ६ ऑक्टोबर २०२६ रोजी सायंकाळी ४ वाजेपर्यंत अधिकृत ई-मेलद्वारे पाठविण्यात आलेला नोंदणी फॉर्म भरून प्रक्रिया पूर्ण करण्याच्या सूचना देण्यात आल्या आहेत. तसेच चर्चेसाठी उपलब्ध विषयांमधून आपल्या आवडीचा विषय प्राधान्यक्रम नोंदविण्याचे निर्देश देण्यात आले आहेत.

जयपूर येथे होणाऱ्या या राष्ट्रीय युवा संसदेत इंजि. शुभम संजीव चौधरी यांना देशभरातील निवडक युवकांसोबत संवाद साधण्याची आणि राष्ट्रीय पातळीवरील चर्चेत सहभागी होण्याची संधी मिळणार आहे. संपूर्ण भारतातून निवड झालेल्या केवळ २०० युवकांमध्ये स्थान मिळवून नंदुरबार जिल्ह्याचे प्रतिनिधित्व करण्याची मिळालेली संधी ही त्यांच्या शैक्षणिक व वैयक्तिक वाटचालीतील महत्त्वपूर्ण टप्पा ठरली आहे.

या निवडीबद्दल बोलताना इंजि. शुभम संजीव चौधरी म्हणाले, “नंदुरबारसारख्या आदिवासीबहुल जिल्ह्यातून राष्ट्रीय युवा संसदेसाठी प्रतिनिधित्व करण्याची संधी मिळणे ही माझ्यासाठी अत्यंत अभिमानाची बाब आहे. या व्यासपीठावर जिल्ह्यातील युवकांच्या आकांक्षा, ग्रामीण भागातील प्रश्न आणि राष्ट्रनिर्माणातील युवकांची भूमिका प्रभावीपणे मांडण्याचा माझा प्रयत्न राहील.”

धानोरा ते राष्ट्रीय युवा संसद असा प्रवास करणाऱ्या इंजि. शुभम संजीव चौधरी यांच्या निवडीचे सर्व स्तरांतून अभिनंदन होत असून, नंदुरबारच्या युवा शक्तीला राष्ट्रीय व्यासपीठ मिळाल्याची भावना व्यक्त होत आहे.

ईश्वर तुंबा मराठे