जळगावच्या केळी निर्यातीला आंतरराष्ट्रीय स्तरावर गती देण्यासाठी केंद्र सरकारचे विशेष पथक जिल्हा दौऱ्यावर; पायाभूत सुविधांची प्रत्यक्ष पाहणी

जिल्ह्याची प्रमुख कृषिओळख असलेल्या व जी.आय. मानांकन (GI Tag) प्राप्त ‘जळगाव केळी’ला जागतिक बाजारपेठेत अधिक सक्षमपणे पोहोचवण्यासाठी आणि निर्यात साखळी बळकट करण्यासाठी केंद्र सरकारच्या विशेष पथकाने नुकताच जळगाव जिल्ह्याचा दौरा केला.
कृषी व शेतकरी कल्याण मंत्रालय (MIDH) आणि राष्ट्रीय शीत साखळी विकास केंद्र (NCCD) यांच्या वरिष्ठ अधिकार्यांच्या या केंद्रीय पथकाने जिल्हाधिकारी यांच्या उपस्थितीत जिल्ह्यातील निर्यात पायाभूत सुविधांची प्रत्यक्ष पाहणी केली.

केंद्रीय पथकातील प्रमुख सदस्य: सदर दौऱ्यामध्ये श्री. आशिष फोतेदार (COO, NCCD), श्री. राहुल कुमार (SP, MIDH), श्री. प्रितम सरकार (सल्लागार, NCCD), डॉ. पी. सुरेश कुमार (प्रधान शास्त्रज्ञ, ICAR), डॉ. जी. प्रभू (वरिष्ठ शास्त्रज्ञ, ICAR), श्री. वाघमारे (APEDA, मुंबई), श्री सिद्धेश एस. (सीनियर Horticulturist) आणि नोडल ऑफिसर म्हणून श्री. सतीश गरजे (CEO, HALCON, नाशिक) यांचा समावेश होता.

दौऱ्यातील प्रमुख भेटी व क्षेत्रीय पाहणी:

भुसावळ (CONCOR डेपो): पथकाने भुसावळ येथील कॉन्कोर (CONCOR) डेपोला भेट देऊन रेल्वे व रस्ते वाहतुकीचे लॉजिस्टिक्स आणि पायाभूत सुविधांची तांत्रिक पाहणी केली.

सावदा, रावेर (APEDA कोल्ड स्टोरेज): सावदा येथील ‘अपेडा’ (APEDA) संचलित कोल्ड स्टोरेजला भेट देऊन केळी साठवणूक क्षमता आणि शीत साखळी व्यवस्थापनाचा (Cold Chain Management) सविस्तर आढावा घेतला.

तांदलवाडी, रावेर (पॅक हाऊस): तांदलवाडी येथील प्रगतिशील शेकऱ्यांच्या प्रत्यक्ष निर्यातक्षम केळी बागेला व अद्ययावत पॅक हाऊसला (Pack House) भेट देऊन काढणीपश्चात व्यवस्थापन (Post-Harvest Management) प्रक्रियेची पाहणी केली व उत्पादकांशी चर्चा केली.

दौऱ्याचा मुख्य प्रशासकीय उद्देश: जिल्ह्यातील केळी निर्यातीमधील प्री-कूलिंग युनिट्स, रीफर कंटेनर्स आणि पॅक हाऊसेसची सद्यस्थिती तपासणे, हा या दौऱ्याचा मुख्य उद्देश आहे. निर्यातीमधील तांत्रिक त्रुटी दूर करून केंद्र व राज्य सरकारच्या विविध योजनांच्या (उदा. MIDH, APEDA) समन्वयातून जळगावच्या केळीला थेट आंतरराष्ट्रीय बाजारपेठ मिळवून देण्यासाठी हा दौरा महत्त्वपूर्ण ठरेल.

“जळगावच्या केळीला आंतरराष्ट्रीय बाजारपेठेत हक्काचे स्थान मिळवून देण्यासाठी लॉजिस्टिक्स आणि शीत साखळी (Cold Chain) अधिक मजबूत करणे आवश्यक आहे. केंद्रीय पथकाद्वारे प्राप्त होणार्या तांत्रिक मार्गदर्शनाच्या आधारे जिल्ह्यातील निर्यात पायाभूत सुविधांचा दर्जा उंचावण्यासाठी जिल्हा प्रशासन सर्वतोपरी काम करेल.” > — जिल्हा प्रशासन, जळगाव

जिल्हा प्रशासन, जळगाव — पारदर्शक, गतिमान आणि लोकाभिमुख कार्यप्रणाली.